# Metodologiya va tahririy siyosat

> HuquqTech · https://huquqtech.uz/metodologiya
> Matn lex.uz rasmiy manbasidan olingan va avtomatik yangilanadi. Huquqiy ahamiyatga ega qarorlar uchun rasmiy nashrga va malakali mutaxassisga murojaat qiling.

HuquqTech — huquqiy ma'lumot platformasi. Quyida javoblar qanday tayyorlanishi, manba qayerdan olinishi va qanday cheklovlar borligi ochiq yozilgan. Bu sahifa foydalanuvchiga ham, javobimizni iqtibos keltiradigan qidiruv va AI tizimlariga ham mo'ljallangan.

## 1. Manba — faqat rasmiy qonun matni

Platformadagi barcha qonun matni O'zbekiston Respublikasi qonun hujjatlari milliy ma'lumotlar bazasi — lex.uz dan olinadi. Boshqa hech qanday ikkilamchi manba, sharh yoki tarjima to'plami ishlatilmaydi.

Rus tilidagi modda matni mashina tarjimasi EMAS: lex.uz o'zi chop etadigan rasmiy rus nashridan alohida yuklab olinadi. Shu sabab ruscha o'qiyotgan foydalanuvchi ham huquqiy jihatdan aniq matnni ko'radi.

## 2. Yangilanish tartibi

Har bir hujjat har 24 soatda avtomatik tekshiriladi. Modda matni o'zgargani mazmun bo'yicha aniqlanadi — o'zgarmagan moddalar qayta ishlanmaydi, o'zgarganlari esa darhol yangilanadi.

Qonun matni platformaning hech bir joyiga NUSXALANMAYDI. Dars, savol-javob va AI javobidagi har bir iqtibos bazadan real vaqtda olinadi. Ya'ni lex.uz da tahrir o'zgarsa, sayt ham o'z-o'zidan yangilanadi va eskirgan raqam qolib ketmaydi.

## 3. AI javobi qanday tayyorlanadi

Savol tahlil qilinadi va huquq sohasi aniqlanadi. So'ng savol rasmiy huquqiy atamalar bilan kengaytiriladi: foydalanuvchi kundalik tilda yozadi, qonun esa rasmiy atama ishlatadi.

Kengaytirilgan so'rov bo'yicha qonun bazasidan eng mos moddalar qidirib topiladi (RAG — Retrieval-Augmented Generation). AI modeliga manba sifatida FAQAT shu topilgan matn beriladi.

Model uchun qat'iy qoida amal qiladi: muddat, foiz, summa yoki jazo o'lchami topilgan matnda bo'lmasa, uni taxmin qilish TAQIQLANADI — javobda tekshirish tavsiya etiladi. Umumiy AI chatbotlaridagi asosiy xato — modda raqamini o'ylab topish — aynan shu qoida bilan oldi olinadi.

## 4. Nima tekshiriladi

Darslar va savol-javob sahifalaridagi har bir qonun havolasi bazaga solishtirib tekshiriladi: modda mavjudmi va uning sarlavhasi mavzuga mos keladimi. Mavjud, lekin noto'g'ri moddaga havola sahifada jimgina noto'g'ri iqtibos ko'rsatardi — shuning uchun faqat "modda bor" tekshiruvi yetarli emas.

Hujjat manzillari ham taxmin qilinmaydi: har bir lex.uz hujjati sahifa ochilishi va SARLAVHASI kutilganiga mos kelishi bo'yicha alohida tasdiqlanadi.

## 5. Cheklovlar (ochiq aytilgan)

HuquqTech advokat emas va advokat xizmatini almashtirmaydi. U dastlabki yo'naltirish va umumiy huquqiy ma'lumot beradi. Sud jarayoni, shartnoma imzolash yoki jiddiy moliyaviy oqibatga ega qarorlar uchun malakali mutaxassisga murojaat qiling.

Javoblar faqat O'zbekiston Respublikasi qonunchiligiga tegishli; boshqa davlatlar huquqi qamrab olinmagan.

Qidiruv 100% aniq emas: ba'zan eng mos emas, yaqin mavzudagi modda topilishi mumkin. Shuning uchun har bir javobda qonun moddasining o'ziga havola beriladi — foydalanuvchi manbani o'zi o'qib tekshirishi mumkin.

## 6. Xato topsangiz

Noto'g'ri iqtibos yoki eskirgan matn topsangiz, bizga xabar bering — tekshirib tuzatamiz. Aloqa: toxirovi82@gmail.com yoki Telegram: @mening_huquqlarim_bot