HuquqTech
Chorvachilik tarmoqlarini yanada rivojlantirish, chorvachilik xoʻjaliklarini moliyaviy qoʻllab-quvvatlash, chorva ozuqa bazasini yanada koʻpaytirish, shuningdek, aholining yirik chorvachilik xoʻjaliklari va chorvachilik mahsulotlarini qayta ishlovchilar bilan hamkorlikdagi faoliyati asosida (keyingi oʻrinlarda — kooperatsiya usulida) oʻz xonadonlarida chorva mollarini boqishini tashkil etish va chorva ozuqa bazasiga boʻlgan talabini qondirish maqsadida:
1. Quyidagilar:
paxta va gʻalla yetishtiruvchi subyektlar tomonidan 2 million gektar sugʻoriladigan yer maydonining 10 foiziga almashlab ekish taʼminlanadigan yer maydonlari hajmi 1-ilovaga muvofiq;
2022 — 2024-yillarda paxta-toʻqimachilik, gʻallachilik va sholichilik klasterlari tomonidan tashkil etiladigan chorvachilik komplekslarida chorva bosh sonini koʻpaytirish va chorvachilik mahsulotlarini ishlab chiqarish prognoz koʻrsatkichlari 2-ilovaga muvofiq tasdiqlansin.
2. Bosh vazir oʻrinbosari Sh. Gʻaniyev, Qoraqalpogʻiston Respublikasi Vazirlar Kengashi, viloyatlar hokimliklari hamda Veterinariya va chorvachilikni rivojlantirish davlat qoʻmitasi (B. Norqobilov):
Qishloq xoʻjaligi vazirligi bilan birgalikda mazkur qarorga 1-ilovaga muvofiq hajmdagi yer maydonlarida beda va chorva ozuqa ekinlari ekilishini;
“Oʻzbekiston paxta-toʻqimachilik klasterlari” uyushmasi hamda paxta-toʻqimachilik, gʻallachilik va sholichilik klasterlari bilan birgalikda mazkur qarorga 2-ilovaga muvofiq klasterlar tomonidan 500 — 1 000 boshga moʻljallangan chorvachilik komplekslari tashkil etilishini taʼminlasin.
3. Qoraqalpogʻiston Respublikasi Vazirlar Kengashi va viloyatlar hokimliklari:
Veterinariya va chorvachilikni rivojlantirish davlat qoʻmitasi bilan birgalikda 2022-2023-yillarda har bir tumanda kamida 1 tadan goʻsht va sut mahsulotlarini yetishtiruvchi va qayta ishlovchi korxonalar tomonidan aholi xonadonlariga kooperatsiya usulida chorva mollari yetkazib berishni va yetishtirilgan mahsulotlarni qayta ishlash va sotishni tashkil etsin;
Qishloq xoʻjaligi vazirligi bilan birgalikda oʻzlashtiriladigan va boʻsh turgan yer maydonlari hisobidan aholi xonadonlariga kooperatsiya usulida chorva mollari yetkazib berishni va yetishtirilgan chorva mahsulotlarini qayta ishlashni tashkil etgan goʻsht va sut mahsulotlarini yetishtiruvchi va qayta ishlovchi korxonalarga, aholiga chorva ozuqasini yetkazib berish sharti bilan, chorva bosh soniga mutanosib ravishda ozuqa yerlarining elektron onlayn auksion savdolari asosida ijaraga berilishini taʼminlasin;
(3-bandning uchinchi xatboshisi Oʻzbekiston Respublikasi Prezidentining 2024-yil 7-maydagi PF-76-sonli Farmoni tahririda — Qonunchilik maʼlumotlari milliy bazasi, 10.05.2024-y., 06/24/76/0336-son)
ozuqa bazasini yetishtirish uchun sugʻoriladigan yer maydonlari yetishmovchiligi mavjud boʻlgan tumanlarda goʻsht va sut mahsulotlariga boʻlgan isteʼmol talabini toʻliq qondirish maqsadida kooperatsiya usulida goʻsht va sut mahsulotlarini yetishtirish va qayta ishlashni yoʻlga qoʻygan xoʻjalik yurituvchi subyektlarga Qoraqalpogʻiston Respublikasi va viloyatlar chegaralari doirasida bir tumanda kooperatsiya usulida goʻsht va sut mahsulotlarini yetishtirishni tashkil etish hamda boshqa tumanda ozuqa ekinlarini yetishtirish uchun elektron onlayn auksion savdolari asosida sugʻoriladigan yerlar ajratishni taʼminlasin. Bunda, kooperatsiya usulida faoliyat olib boruvchi subyektlarga mazkur qarorda belgilangan barcha imtiyozlar qoʻllaniladi.
(3-bandning toʻrtinchi xatboshisi Oʻzbekiston Respublikasi Prezidentining 2024-yil 7-maydagi PF-76-sonli Farmoni tahririda — Qonunchilik maʼlumotlari milliy bazasi, 10.05.2024-y., 06/24/76/0336-son)
4. Shunday tartib oʻrnatilsinki, unga koʻra kooperatsiya usulida goʻsht va sut mahsulotlarini yetishtirish va qayta ishlashni yoʻlga qoʻygan xoʻjalik yurituvchi subyektlarga:
(4-bandning ikkinchi xatboshisi Oʻzbekiston Respublikasi Prezidentining 2023-yil 10-noyabrdagi PF-193-sonli Farmoniga asosan chiqarilgan — Qonunchilik maʼlumotlari milliy bazasi, 11.11.2023-y., 06/23/193/0844-son)
chorvachilik yoʻnalishida jalb qilinadigan xalqaro moliya institutlarining kredit mablagʻlari 10 yil muddatga 3 yil imtiyozli davr bilan ajratiladi.
Tijorat banklariga chorvachilik sohasidagi loyihalarni moliyalashtirish, shu jumladan aylanma mablagʻlarni toʻldirish va modernizatsiya qilish uchun mazkur qaror qabul qilingunga qadar ajratilgan kreditlarning qaytarish muddatini oʻn yilgacha tadbirkorlarning arizalariga koʻra uzaytirish tavsiya etilsin.
5. Belgilansinki, 2022-yil 1-yanvardan boshlab 2023-yil 31-dekabrga qadar:
qoʻshilgan qiymat soligʻi toʻlovchisi boʻlgan chorvachilik xoʻjaliklariga — oʻz xoʻjaliklarida va aholi xonadonlari bilan birgalikda kooperatsiya usulida yetishtirilib, goʻsht uchun realizatsiya qilingan yirik va mayda shoxli qoramollar tirik vaznining har bir kilogrammi uchun subsidiyaning miqdori 2 000 soʻmdan 4 000 soʻmga hamda sutning har bir litri uchun 200 soʻmdan 400 soʻmga oshiriladi. Bunda, subsidiya qoʻshilgan qiymat soligʻidan vaqtinchalik ozod qilish boʻyicha imtiyoz amalda boʻlgan davr uchun ham toʻlanadi;
chorvachilik xoʻjaliklari tomonidan kredit va lizing shartlari asosida xarid qilingan qishloq xoʻjaligi texnikalari kredit va lizing foizi xarajatlarining 10 foiz punktidan ortiq qismi Moliya vazirligi huzuridagi Qishloq xoʻjaligini davlat tomonidan qoʻllab-quvvatlash jamgʻarmasi tomonidan respublika budjeti hisobidan qoplab beriladi;
ozuqa ekin yer maydonlarida yomgʻirlatib va tomchilatib sugʻorish texnologiyalarini joriy etgan chorvachilik xoʻjaliklariga uning har bir gektari uchun 8 million soʻm miqdorida respublika budjeti hisobidan belgilangan tartibda subsidiya ajratiladi;
gidroponika usulida chorva mollariga ozuqa yetishtirish uskunalarini xarid qilish xarajatining 20 foizi respublika budjeti hisobidan qoplab beriladi. Bunda, mazkur uskuna qiymatining 100 million soʻmdan oshmagan qismi qoplanadi.
6. Tadbirkorlik subyektlari tomonidan oʻrnatilgan tartibda shakllantiriladigan roʻyxat boʻyicha xorijdan olib kelinadigan, ishlab chiqarilganiga 5 yildan oshmagan ozuqa ekinlarini ekish, yigʻish va ozuqa tayyorlash qishloq xoʻjaligi texnikalari, ularning butlovchi buyumlari va ehtiyot qismlari, istisno tariqasida, 2025-yil 1-martga qadar bojxona toʻlovlaridan (qoʻshilgan qiymat soligʻi va bojxona rasmiylashtiruvi yigʻimlaridan tashqari) va utilizatsiya yigʻimidan ozod qilinsin hamda tadbirkorlik subyektlariga “erkin muomalaga chiqarish” bojxona rejimiga joylashtirilgan sanadan boshlab qoʻshilgan qiymat soligʻini 120 kungacha boʻlgan muddatga kechiktirib toʻlashga ruxsat berilsin.
(6-band Oʻzbekiston Respublikasi Prezidentining 2024-yil 14-oktabrdagi PF-156-sonli Farmoni tahririda — Qonunchilik maʼlumotlari milliy bazasi, 15.10.2024-y., 06/24/156/0816-son. Kuchga kirish sanasi — 2025-yil 16-yanvar)
7. Suv xoʻjaligi vazirligi Qishloq xoʻjaligi vazirligi bilan birgalikda bir oy muddatda har bir tumanning konturlari kesimida vegetatsiya davrida ajratiladigan suv limitlari hamda ozuqabop ekin turlarining suvga boʻlgan talabidan kelib chiqqan holda, kundalik ravishda yangilab boriladigan sugʻorish grafiklari haqidagi axborotni oʻz ichiga oluvchi elektron onlayn platformani tashkil etsin.
8. Quyidagilarga:
a) Oʻzbekiston Respublikasi Bosh vazirining oʻrinbosari Sh. Gʻaniyev, Qoraqalpogʻiston Respublikasi Vazirlar Kengashi Raisi va viloyatlar hokimlari zimmasiga:
paxta va gʻalla yetishtiruvchi subyektlar tomonidan mazkur qarorga 1-ilovaga muvofiq hajmdagi yer maydonlarida beda va chorva ozuqa ekinlarini ekish;
paxta-toʻqimachilik, gʻallachilik va sholichilik klasterlari tomonidan mazkur qarorga 2-ilovaga muvofiq chorvachilik komplekslarini tashkil etish;
har bir tumanda kamida 1 tadan goʻsht va 1 tadan sut yoʻnalishida goʻsht va sut mahsulotlarini yetishtiruvchi va qayta ishlovchi korxonalar tomonidan aholi xonadonlariga kooperatsiya usulida chorva mollari yetkazib berishni va yetishtirilgan chorva mahsulotlarini qayta ishlashni tashkil etish;
b) Davlat soliq qoʻmitasi raisi Sh. Kudbiyev zimmasiga:
yirik va mayda shoxli qoramollar tirik vaznining har bir kilogrammi uchun hamda sutning har bir litri uchun subsidiya olgan xoʻjalik subyektlari qoʻshilgan qiymat soligʻi toʻlovchisi sifatida soliq organlarida roʻyxatdan oʻtganligini nazorat qilib borish;
mazkur qarorga 1-ilovaga muvofiq hajmdagi yer maydonlarida beda va chorva ozuqa ekinlari ekilganligini nazorat qilib borish hamda har chorakda Chorvachilik va uning tarmoqlarini rivojlantirish Respublika kengashiga axborot kiritib borish;
v) suv xoʻjaligi vaziri Sh. Xamrayev zimmasiga elektron onlayn platformaning belgilangan muddatda ishga tushirilishini va uning doimiy ravishda yangilab borilishini taʼminlash;
g) Veterinariya va chorvachilikni rivojlantirish davlat qoʻmitasi raisi B. Norqobilov va “Oʻzbekchorvanasl” agentligi direktori B. Atamurodov zimmasiga qarorning oʻz vaqtida va samarali ijro etilishini taʼminlash hamda yuzaga keladigan muammolarni bartaraf etish yuzasidan Chorvachilik va uning tarmoqlarini rivojlantirish Respublika kengashiga hamda Vazirlar Mahkamasiga takliflar kiritish boʻyicha javobgarlik yuklansin.
9. Veterinariya va chorvachilikni rivojlantirish davlat qoʻmitasi Qishloq xoʻjaligi vazirligi, Adliya vazirligi, boshqa manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.
10. Mazkur qarorning ijrosini nazorat qilish Oʻzbekiston Respublikasi Prezidenti Administratsiyasi rahbari Z.Sh. Nizomiddinov va Oʻzbekiston Respublikasi Bosh vazirining oʻrinbosari Sh.M. Gʻaniyev zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2022-yil 8-fevral,
PQ-121-son
Oʻzbekiston Respublikasi Prezidentining 2022-yil 8-fevraldagi PQ-121-son qaroriga 1-ILOVA
Paxta va gʻalla yetishtiruvchi subyektlar tomonidan 2 million gektar sugʻoriladigan yer maydonining 10 foiziga almashlab ekish taʼminlanadigan yer maydonlari
Oʻzbekiston Respublikasi Prezidentining 2022-yil 8-fevraldagi PQ-121-son qaroriga 2-ILOVA
2022 — 2024-yillarda paxta-toʻqimachilik, gʻallachilik va sholichilik klasterlari tomonidan tashkil etiladigan chorvachilik komplekslarida chorva bosh sonini koʻpaytirish va chorvachilik mahsulotlarini ishlab chiqarish